Ingredientes
Masa de pan gramada con aceite, 1 quilo de polbo, 2 cebolas grandes, 1 pemento verde, 1 sobre de azafrán, 1/4 litro de aceite e sal.
Preparación
| No caso de que non sexa conxelado, o polbo débese mazar (fregar contra unha superficie áspera, por exemplo unha pedra) ou meter no conxelador por espacio de dous días. Cócese durante unha media hora cunhas areas de sal. Mentres faise un rustrido no aceite coa cebola e o pemento ben picados, engadíndolle unhas areas de sal. Cando a cebola está douradiña retírase do lume, bótase o azafrán e reméxese un chisco. Córtase o polbo en anacos. Cun rolete estarrícase a metade da masa, ponse sobre a lata engraxada, repártese por riba o polbo e engádeselle o rustrido sen o aceite (para que non pingue fóra da masa). Estarrícase a outra metade da masa, cóbrese a zaragallada, sélase pola beira, fáiselle o buraco no medio e vérquese o aceite polo mesmo. Ponse ó forno ata que adquira a cor desexada. Variantes: Nas vilas de beiramar non adoitan coce-lo polbo, senón que o desmexan (ver glosario) e logo proceden a cortalo poñéndoo na empanada en cru coma se doutro peixe calquera se tratase. Deste xeito, conserva máis o sabor de seu. Neste caso non lle fan o burato nun principio, para que o polbo coza antes. Hai quen a fai con cebola en cru e quen sen pemento verde. |
© Mariano García – Fina Casalderrey, 1993