Ingredientes
1 quilo de fariña milla, 1/4 de fariña de centeo, 1/2 cunca de fermento (ver como se fai nos trucos e advertencias), auga e sal.
Preparación
| Ponse a auga a ferver. Nunha cazola de barro bótase a fariña milla e sal. Vérquese a auga fervendo (3/4 de litro aproximadamente) sobre a fariña e vaise remexendo cunha culler de pao ata que faga unha masa (noutrora a esta acción chamábanlle “empilla-la masa” e utilizábase a “empilladeira”, unha pa espatelada, de pao, longa e co mango redondo). Logo déixase enfriar no mesmo recipiente, estarricándoa todo o posible. Cando está morna bótaselle o fermento e a fariña centea (deixando quedar unha chisca nun prato) e séguese amasando sen botar máis auga ata que queden as mans limpas. Xúntase nunha bola e aplánase coas mans para que quede ben lisa. Bótaselle un chisco da fariña centea por riba e déixase repousar. Cando agreta está a punto. Variante: Pódese mestura-la fariña con triga e centea á vez. Desfigura un chisco o sabor a “millo”. Mesmo hai quen a fai a proporcións iguais das tres fariñas |
© Mariano García – Fina Casalderrey, 1993