Melindres de Melide  
     
 
 
     

Ingredientes  
     
  250 gramos de fariña triga, 6 xemas de ovo, unha cullerada de manteiga cocida de vaca e azucre para o baño.  
     

Preparación  
     
 

Amásanse as xemas de ovo, a manteiga (previamente diluída e fría) e a fariña. Cando a masa está ben ligada estarrícase, córtase en tiras duns 10 cm. e dáselle forma cilíndrica. Xúntanse os extremos dándolle forma de rosquillas (ó medra-la masa o oco é case imperceptible). Colócanse nunha prata de forno, previamente enfariñada, e déixanse repousar unha hora e media. Métense no forno a 230º durante uns 20 minutos. Cando collen unha cor castaña non moi escura retíranse. Déixanse arrefriar e agárdase entre un e dous días. Báñanse cun xarope de azucre en punto de fío dándolle voltas ata que comezan a pegar entre eles. Déixanse secar. Poden aguantar un mes en boas condicións.

Variante:

Pódeselles botar anís ou mel (Silleda), e mesmo substituí-la fariña triga por améndoa moída ou mesturadas (Allariz), ou cun pouco de gran de améndoa (Ponteareas).