Bola larpeira  
     
 
 
     

Ingredientes  
     
  1 quilo de fariña triga, 5 ovos e 2 xemas, 1 vaso de anís, 30 gramos de lévedo prensado, 1/2 sobre de lévedo en po, 125 gramos de manteiga crúa de vaca, 350 gramos de azucre, 1 limon, 1/4 litro de leite e sal.  
     

Preparación  
     
 

De véspera, cunha puñada da fariña, o lévedo prensado, un chisco de sal e auga, faise unha masa solta que ha de se-lo fermento impulsor.

Xa no momento de amasar, mestúrase o leite cun cuarto de quilo de azucre (o resto resérvase), reméxese. Sobre unha superficie lisa bótase a fariña (reservando unha boa puñada para ir secando a masa), fáiselle un oco no medio sobre o que se botan os ovos, o lévedo en po, medio vaso de anís, a manteiga e o leite co azucre. Amásase un pouco e engádeselle o fermento, o zume e a reladura do limón. Continúase amasando e salferindo de fariña, ata que non pegue.

Úntase de manteiga un papel de forno, enfaríñase, ponse sobre el a masa, xa redondeada, e salfírese de fariña. Déixase levedar nun lugar abrigado ata que case dobre o seu tamaño (logo no forno aínda medra máis).

No intre de metela no forno límpaselle a fariña, dánselle uns cortes cun coitelo (figurando rombos ou cadrados...) e báñase con ovo batido. Coce a temperatura media alta durante uns trinta e cinco minutos.

Prepárase un xarope en cru batendo o resto do anís co azucre reservado. Ó sacala do forno vólvese bañar con ovo, rechéanse os cortes co xarope de azucre e métese de novo no forno durante uns minutos.

Notas:

Se a masa queda moi dura engádeselle máis leite.

Esta bola larpeira que ten a súa orixe na tradicional bola de dulce da comarca, e coñecida tamén como a bola do patrón, hoxe adoita completarse con crema pasteleira nos cortes, no mesmo momento de lle bota-lo xarope.